ភ្នំពេញ៖ លោក ហ៊ុន ម៉ានី បានបង្ហោះសាររំលែកទុក្ខនិងសេចក្ដីនឹកស្រណោះចំពោះការបាត់បង់ជីដូនក្មេកនិងជាអ្នកដែលមានគុណដែលតែងផ្ដល់នូវកម្លាំងចិត្តនិងក្ដីស្រលាញ់ប្រកបដោយព្រហ្មវិហារធម៌ដល់រូបលោកនិងក្រុមគ្រួសារជានិច្ច។
តាមរយៈការបង្ហោះសារនៅលើគេហទំព័រហ្វេសប៊ុក នៅព្រឹកថ្ងៃទី២៨ ខែកញ្ញា ឆ្នាំ២០២២ លោក ហ៊ុន ម៉ានី បានឱ្យដឹងថា រូបលោកនិងក្រុមគ្រួសារមានទុក្ខជាទម្ងន់ ដោយកាលពីព្រឹកថ្ងៃទី២៨ ខែកញ្ញា ឆ្នាំ២០២២ មហាឧបាសិកា ទន់ ធី ដែលត្រូវជាជីដូនក្មេក និងជីដូនបានទទួលមរណភាពក្នុងជន្មាយុ ៩០ឆ្នាំដោយជរាពាធ ។
លោកថា៖ «លោកយាយគឺជាអ្នកមានគុណដ៏ល្អដែលបានលះបង់កម្លាំងកាយចិត្តថែទាំ និងផ្តល់នូវក្តីស្រលាញ់ប្រកបដោយព្រហ្មវិហារធម៌ចំពោះក្រុមគ្រួសារជានិច្ច។ ក្នុងនាមជាចៅប្រសារ ចៅបង្កើត និងចៅទួត យើងខ្ញុំទាំងអស់គ្នាសូមបួងសួងឱ្យវិញ្ញាណក្ខ័ន្ធ លោកយាយបានសោយសុខក្នុងសុគតិភពកុំបីឃ្លៀងឃ្លាតឡើយ»។
ក្នុងនោះ លោកក៏បានបញ្ជាក់ដែរថា សារនេះក៏ជាការជូនដំណឹងដល់សហការី បងប្អូនញាតិមិត្តជិតឆ្ងាយទាំងអស់ជ្រាបជាព័ត៌មានផងដែរ៕
